Më 09-10 qershor 2026, Oficerë të Patrullës së Përgjithshme dhe personel nga Salla e Komandës dhe Kontrollit të Komisariatit të Policisë Tropojë (DVP Kukës) morën pjesë në trajnimin e zhvilluar nga Ekipi i Menaxhimit të Programit SCPA.  Gjatë këtij trajnimi pjesëmarrësit u njohën si me pjesën teorike ashtu edhe me ushtrimet praktike dhe me punën në grup, duke u fokusuar në filozofinë e Policimit në Komunitet dhe zbatimin e elementeve të saj në punën e përditshme të oficerëve të Policisë së Shtetit. Gjithashtu, atyre iu prezantuan situata/ushtrime praktike për t’u trajtuar dhe zgjidhur prej tyre teksa punuan në grup me synimin për të siguruar masat që duhen marrë në mënyrë proaktive për zbatimin e elementeve të Policimit në Komunitet. Vëmendje e veçantë iu kushtua trajtimit të rasteve të Dhunës në Familje si në aspektin teorik ashtu edhe atë praktik. Praktikat më të mira të BE-së për zbatimin e filozofisë së PK u ndanë e shkëmbyen me oficerët e PSH. Në përfundim të këtij trajnimi, oficerët e PSH arrijnë të përmirësojnë njohuritë dhe kapacitetet e tyre për zbatimin e Policimit në Komunitet.

Më 3 qershor 2026, shoqata “Unë, Gruaja” zhvilloi një sesion informues me nxënësit e gjimnazit “Nefail Rozani” në Podgorie, Maliq me fokus rreziqet e dhunës dixhitale dhe mbrojtjen në hapësirën online. Në aktivitet morën pjesë nxënës, stafi pedagogjik i shkollës, përfaqësues të Policisë së Shtetit, specialistë të Njësisë së Mbrojtjes së Fëmijëve, specialistë të shërbimeve sociale dhe përfaqësues të shoqatës “Unë, Gruaja”. Aktiviteti u zhvillua në kuadër të projektit “Parandalojmë dhunën në familje përmes koordinimit institucional”. Gjatë diskutimeve u trajtuan rreziqet që lidhen me përdorimin e pakontrolluar të rrjeteve sociale, mekanizmat e raportimit të rasteve të dhunës online dhe roli i institucioneve në identifikimin dhe trajtimin e tyre. Nxënësit u informuan mbi rëndësinë e mbrojtjes së të dhënave personale dhe përdorimit të sigurt të internetit.

Në kuadër të zbatimit të Skemës së Granteve, më 3 Qershor 2026 u organizua në Bashkinë Vau Dejës një takim me anëtarët e Mekanizmit të Koordinuar të Referimit (MKR), i cili u iniciua nga organizata ‘Gruaja tek Gruaja’. Aktiviteti kishte si qëllim informimin dhe diskutimin mbi ndryshimet e fundit në kuadrin ligjor për parandalimin dhe trajtimin e dhunës në familje, si dhe reflektimin mbi ndikimin e tyre në punën institucionale. Në takim morën pjesë përfaqësues nga institucione dhe organizata anëtare të MKR-së, përfshirë struktura të arsimit, policisë, shërbimeve sociale, shëndetësore dhe organizata të shoqërisë civile. Ky përfaqësim i gjerë mundësoi një shkëmbim të rëndësishëm përvojash dhe një diskutim ndërinstitucional mbi sfidat e zbatimit të legjislacionit. Gjatë aktivitetit u prezantuan ndryshimet ligjore dhe u zhvillua një diskutim i hapur me pjesëmarrje aktive dhe interes të lartë nga të pranishmit, të cilët ndanë përvoja dhe raste konkrete nga praktika e tyre. U evidentuan disa sfida të rëndësishme në zbatim, përfshirë moszbatimin e plotë të Urdhrit për Masat Paraprake të Mbrojtjes së Menjëhershme (UMPMM), vështirësitë e grave në zonat rurale për punësim dhe akses në trajnime profesionale, si dhe mungesën e mbledhjeve të rregullta të MKR-së që ndikon në koordinimin ndërinstitucional. Si pikë e fortë u nënvizua puna e vazhdueshme me vlerësimet në familje për rastet e trajtuara. Në përfundim, u theksua rëndësia e forcimit të bashkëpunimit dhe vijimit të aktiviteteve të ngjashme.  

Shoqata “Atletët Veteranë të Shqipërisë”, në zbatim të projektit “Sport & Siguri – Policimi Komunitar nëpërmjet Ndërgjegjësimit dhe Atletikës”, pjesë e raundit të dytë të Skemës së Granteve, organizoi gjatë muajit maj 2026 aktivitete ndërgjegjësimi dhe sportive në shkollën “Osman Myderizi” dhe në shkollën “Kristaq Rama”. Temat e trajtuara gjatë sesionit përfshinin tema të tilla si parandalimi i ngacmimit dhe dhunës në shkollë, menaxhimi paqësor i konflikteve, siguria online dhe mbrojtja nga rreziqet dixhitale, përdorimi i sigurt i rrjeteve sociale, rëndësia e raportimit të rasteve problematike tek mësuesit, prindërit ose Policia, roli i Policisë së Shtetit në mbrojtjen e të rinjve dhe komunitetit. Aktivitetet përfshinë rreth 120 nxënës të moshës 12-15 vjeç nga këto dy shkolla 9-vjeçare të Bashkisë së Tiranës, me pjesëmarrjen aktive të përfaqësuesve të Oficerëve të Policimit në Komunitet, stafit pedagogjik dhe ekipit të projektit.  

Më 02-04 qershor 2026, Oficerë të Patrullës së Përgjithshme dhe personel nga Salla e Komandës dhe Kontrollit të DVP Kukës morën pjesë në trajnimin e zhvilluar nga Ekipi i Menaxhimit të Programit SCPA.  Gjatë këtij trajnimi pjesëmarrësit u njohën si me pjesën teorike ashtu edhe me ushtrimet praktike dhe me punën në grup, duke u fokusuar në filozofinë e Policimit në Komunitet dhe zbatimin e elementeve të saj në punën e përditshme të oficerëve të Policisë së Shtetit. Gjithashtu, atyre iu prezantuan situata/ushtrime praktike për t’u trajtuar dhe zgjidhur prej tyre teksa punuan në grup me synimin për të siguruar masat që duhen marrë në mënyrë proaktive për zbatimin e elementeve të Policimit në Komunitet. Vëmendje e veçantë iu kushtua trajtimit të rasteve të Dhunës në Familje si në aspektin teorik ashtu edhe atë praktik. Me qëllim për të ofruar module trajnimi gjithëpërfshirëse, ekipi i Programit SCPA bashkëpunoi me Qendrën e Koordinimit Kundër Ekstremizmit të Dhunshëm, ekspertët e së cilës ofruan  leksione ndërvepruese mbi luftën kundër ekstremizmit të dhunshëm. Praktikat më të mira të BE-së për zbatimin e filozofisë së PK u ndanë e shkëmbyen me oficerët e PSH. Në përfundim të këtij trajnimi, oficerët e PSH arrijnë të përmirësojnë njohuritë dhe kapacitetet e tyre për zbatimin e Policimit në Komunitet.

Të rinjtë gjimnazistë të vitit të dytë të shkollës së mesme “Abdulla Keta”, u bënë pjesë e një sesioni ndërgjegjësues mbi policimin në komunitet dhe dhunën me bazë gjinore, ku diskutuan mbi marrëdhëniet e shëndetshme, presionin social, bullizmin dhe sigurinë digjitale. Përmes ushtrimeve të ndryshme interaktive dhe diskutimeve në grup, pjesëmarrësit ndanë mendime dhe reflektime mbi rëndësinë e respektit, komunikimit të shëndetshëm dhe rolit që të rinjtë kanë në krijimin e një komuniteti më të sigurt dhe mbështetës për njëri-tjetrin. Gjithashtu, ata u informuan mbi mekanizmat e raportimit, institucionet ku mund të drejtohen dhe rolin e policimit në komunitet në parandalimin dhe adresimin e rasteve të dhunës, përfshirë edhe dhunën digjitale. Aktiviteti u zhvillua më 26 maj 2026 nga Qendra “Strehëza Edlira Haxhiymeri”, në bashkëpunim me Bashkinë Tiranë, në kuadër të projektit “Forcimi i Policimit në Komunitet në Shqipëri (SCPA)”.  

Në kuadër të projektit “Forcimi i Policimit në Komunitet në Shqipëri (SCPA)”, Qendra “Strehëza Edlira Haxhiymeri” (SEH), në bashkëpunim me Bashkinë Tiranë, zhvilloi një takim me anëtarë të ETN-së dhe institucione lokale mbi menaxhimin dhe dokumentimin e rasteve të dhunës në familje. Pjesëmarrësit diskutuan mbi risitë e Ligjit Nr. 11/2026 “Për Parandalimin dhe Mbrojtjen nga Dhuna ndaj Grave dhe Dhuna në Familje”, përfshirë ndalimin e ndërmjetësimit, detyrimin për raportim, format e reja të dhunës ndaj grave dhe vajzave, si dhuna digjitale dhe ngacmimi në hapësirat publike. Takimi synoi gjithashtu fuqizimin e ETN-së bërthamë në nivel njësie administrative për një reagim më të koordinuar ndaj rasteve.

Më 25 maj 2026, një sesion informues dhe ndërgjegjësues mbi parandalimin e dhunës dhe promovimin e marrëdhënieve të shëndetshme u zhvillua me nxënësit e shkollës 9-vjeçare “Kosova” në Tiranë, nga Qendra Instituti për Zhvillim Strategjik (IZHS). Ky aktivitet u zhvillua në kuadër të projektit “Vendimmarrja që Mbron – Forcimi i reagimit policor dhe standardit profesional në trajtimin e dhunës në familje dhe me bazë gjinore”, pjesë e Skemës së Granteve të Programit SCPA. Qëllimi i aktivitetit ishte informimi dhe ndërgjegjësimi i të rinjve mbi format e ndryshme të dhunës dhe abuzimit, si dhe mbi rëndësinë e identifikimit të hershëm të sjelljeve problematike dhe përdorimit të mekanizmave ekzistues të mbrojtjes dhe raportimit. Gjatë sesionit u diskutuan tema si dhuna në familje, dhuna digjitale, bullizmi, marrëdhëniet e shëndetshme, siguria online dhe mënyrat për të kërkuar ndihmë, duke nxitur reflektim dhe ndërgjegjësim mbi rëndësinë e parandalimit dhe reagimit në kohë.

Më 22 maj 2026, Kuratorium i Sigurisë Rrugore organizoi një aktivitet ndërgjegjësimi pranë Sheshit Nënë Tereza në Tiranë, duke u përqendruar në edukimin e të rinjve rreth rreziqeve të sigurisë rrugore, sjelljes së përgjegjshme dhe rëndësisë së respektimit të rregullave të qarkullimit rrugor. Përmes përvojave ndërvepruese dhe praktike, pjesëmarrësit patën mundësinë të kuptonin më mirë pasojat e sjelljes së pasigurt në rrugë. Nga rrokullisja e simulatorit deri te pista e aktivitetit, çdo element ishte projektuar për të ndihmuar të rinjtë të njohin rreziqet e mundshme përpara se t’i hasin ato në rrugë. Aktiviteti u zbatua në kuadër të bashkëpunimit midis Kuratoriumit të Sigurisë Rrugore dhe Programit SCPA, i mbështetur përmes Skemës së Granteve të Programit.  

Në kuadër të zbatimit të projektit “Skuadra e Sigurisë Publike 2 – Partner për një komunitet të sigurt”, u zhvillua një aktivitet informues dhe ndërgjegjësues me nxënësit e Shkollës së Mesme “Dertliu” në Fier. Aktiviteti u organizua nga Qendra “Epoka e Re” në bashkëpunim me Drejtorinë Vendore të Policisë Fier, Zyrën Vendore të Shërbimit të Provës, Zyrën e Ndihmës Juridike Falas dhe Zyrën Rajonale të Komisionerit për Mbrojtjen nga Diskriminimi. Qëllimi i aktivitetit ishte informimi dhe ndërgjegjësimi i të rinjve mbi problematikat që lidhen me përfshirjen e të rinjve në konflikt me ligjin, rëndësinë e parandalimit të fenomeneve negative, si dhe forcimin e bashkëpunimit ndërmjet institucioneve dhe komunitetit shkollor. Gjatë takimit, përfaqësuesit e institucioneve partnere prezantuan rolin dhe shërbimet që ofrojnë për qytetarët dhe të rinjtë në qytetin e Fierit. Përfaqësuesit e Policisë së Shtetit diskutuan mbi konceptin e policimit në komunitet dhe rëndësinë e bashkëpunimit me të rinjtë për rritjen e sigurisë. Përfaqësuesit e Shërbimit të Provës ndanë informacion mbi pasojat ligjore dhe rëndësinë e rehabilitimit dhe riintegrimit social të të rinjve. Gjithashtu, Zyra e Ndihmës Juridike Falas dhe Zyra Rajonale e Komisionerit për Mbrojtjen nga Diskriminimi informuan pjesëmarrësit mbi shërbimet dhe mekanizmat mbështetës në dispozicion të qytetarëve. Aktiviteti u zhvillua në formë bashkëbisedimi të hapur, ku të rinjtë patën mundësinë të ndajnë mendimet, shqetësimet dhe pyetjet e tyre mbi çështjet e sigurisë dhe sfidat që hasin në komunitet. Ky aktivitet kontribuoi në forcimin e dialogut ndërmjet të rinjve dhe institucioneve lokale, si dhe në rritjen e ndërgjegjësimit mbi rëndësinë e parandalimit dhe përgjegjësisë qytetare.