Në ambientet e Bashkisë Elbasan më 9 tetor 2025 u zhvillua takimi i radhës i Këshillit Vendor për Sigurinë Publike (KVSP), në kuadër të projektit “PARTNER”, që zbatohet nga Shoqata Tjetër Vizion në kuadër të Skemës së Granteve të Programit SCPA. Në takim morën pjesë Kryetari i Bashkisë Elbasan, Prefekti i Qarkut Elbasan, Drejtori i Drejtorise Vendore të Policisë, Drejtuesi i Programit SCPA, Rektorja e Universitetit “A. Xhuvani” Elbasan,  Drejtuesja e Zyrës Vendore Arsimore, përfaqësuesja e Prokurorisë së Rrethit Elbasan,  si dhe të gjithë anëtarët e KVSP Elbasan. Takimi u fokusua në pasqyrimin e aktiviteteve të KVSP, me vëmendje të veçantë ndaj çështjeve të sigurisë publike. Kryetari i Bashkisë prezantoi arritjet dhe sfidat, ndërsa përfaqësuesja e Prokurorisë theksoi rëndësinë e bashkëpunimit ndërinstitucional ndërmjet policisë, prokurorisë dhe organizatave të shoqërisë civile. Përfshirja e Universitetit të Elbasanit u vlerësua si një kontribut i çmuar në analizën dhe ndërgjegjësimin e komunitetit. Përfaqësuesit e Shoqatës Tjeter Vizion prezantuan aktivitetet e projektit “PARTNER” si dhe ecurinë e tyre  dhe me pas u foksuan tek rezultatet e raportit të SMSK 2025 për Qarkun dhe Bashkinë Elbasan, si dhe draft-aplikacionin “Raporto Tani”, që synon të nxisë raportimin e incidenteve në shkolla dhe përmirësimin e sigurisë në mjediset arsimore.  

Më 08-10 tetor 2025, Oficerët e Patrullës së Përgjithshme dhe personeli i Sallës së Komandës dhe Kontrollit të DVP Gjirokastër morën pjesë në trajnimin e zhvilluar nga Ekipi i Menaxhimit të Programit SCPA në ambientet e DVP Gjirokastër. Gjatë këtij trajnimi të trajnuarit u njohën si me pjesën teorike ashtu edhe me ushtrimet praktike dhe me punën në grup, duke u fokusuar në filozofinë e Policimit në Komunitet dhe zbatimin e elementeve të saj në punën e përditshme të oficerëve të Policisë së Shtetit. Gjithashtu, atyre iu prezantuan situata/ushtrime praktike për t’u trajtuar dhe zgjidhur prej tyre teksa punuan në grup me synimin për të siguruar masat që duhen marrë në mënyrë proaktive për zbatimin e elementeve të Policimit në Komunitet. Vëmendje e veçantë iu kushtua trajtimit të rasteve të Dhunës në Familje si në aspektin teorik ashtu edhe atë praktik. Me qëllim për të ofruar module trajnimi gjithëpërfshirëse, ekipi i Programit SCPA bashkëpunoi me Qendrën Kundër Ekstremizmit të Dhunshëm, ekspertët e së cilës ofruan  leksione ndërvepruese mbi luftën kundër ekstremizmit të dhunshëm. Praktikat më të mira të BE-së për zbatimin e filozofisë së PK-së u ndanë e shkëmbyen me oficerët e PSH. Në përfundim të këtij trajnimi, oficerët e PSH arrijnë të përmirësojnë njohuritë dhe kapacitetet e tyre për zbatimin e Policimit në Komunitet.  

Më 8 tetor 2025, Shoqata “Gender, Paqe e Siguri” zhvilloi takimin ndërgjegjësues të rradhës me komunitetin. Takimi u zhvillua në ambientet e Qendrës Komunitare Multifunksionale Nish-Tulla, Durrës me anëtarë të këtij komuniteti. Pjesëmarrësit kishin njohuri të vakëta mbi çështjet e dhunës, dhe takimi shërbeu si një burim i mirë informacioni për të gjithë të pranishmit. Prezente në takim ishin edhe Punonjësja Sociale pranë Njësisë së Vlerësimit të Nevojave dhe Referimit të Rasteve (NJVNR), si dhe Punonjësja e Njësisë së Mbrojtjes së Fëmijëve për Rajonin 5, i cili mbulon zonën ku u zhvillua takimi. Pjesëmarrësit u shprehën se Qendra Komunitare në zonë ka shërbyer si urë lidhëse mes tyre, institucioneve vendore dhe policisë përmes takimeve të shpeshta që zhvillohen.  

Më 6 tetor 2025, u zhvillua takimi i radhës i Këshillit Vendor të Sigurisë Publike Librazhd, me fokus në ndarjen e problematikave që lidhen me sigurinë publike në komunitetin e Librazhdit. Gjatë takimit u prezantua raporti i sistemit të matjes së sigurisë në komunitet, si dhe draft-aplikacioni “Raporto Tani”, një nismë që synon të rrisë transparencën dhe bashkëpunimin midis fëmijëve , mësuesve, prindërve psikologëve, oficerët e sigurisë në shkolla dhe institucioneve të rendit. U zhvillua një diskutim i hapur dhe konstruktiv me drejtuesit e komisariatit të policisë, ku u trajtuan çështje që lidhen me perceptimin e qytetarëve për sigurinë, veçanërisht për fëmijët, problematikat mjedisore, si dhe vlerësimet apo shqetësimet ndaj punës së policisë. Në këtë takim, organizata “Tjetër Vizion”, e mbështetur nga stafi i programit SCPA, pati një rol aktiv në kuadër të projektit “PARTNER”, pjesë raundit 1 të skemës së granteve të programit. Takimi u vlerësua pozitivisht nga të pranishmit, përfshirë Kryetarin e Bashkisë Librazhd, i cili theksoi rëndësinë e përfshirjes së të gjithë anëtarëve – përfaqësues të prokurorisë, OJF-ve dhe komuniteteve fetare – si një vlerë e shtuar për forcimin e sigurisë publike në qytetin tonë.  

Më 1 tetor 2025, në Gramsh u zhvillua takimi i radhës i Këshillit Vendor të Sigurisë Publike, me pjesëmarrjen e Kryetarit të Bashkisë Gramsh, Prefektit të Qarkut Elbasan dhe Shefit të Komisariatit të Policisë Gramsh. Në këtë takim, organizata “Tjetër Vizion”, e mbështetur nga stafi i programit SCPA, pati një rol aktiv në kuadër të projektit “PARTNER”, pjesë raundit 1 të skemës së granteve të programit. Gjatë takimit u prezantua raporti i gjetjeve të anketimit qytetar mbi perceptimin e çështjeve të sigurisë publike dhe problematikat prioritare të qytetarëve. U diskutua mbi situatën aktuale të sigurisë publike, me fokus te dhuna në familje, siguria e të rinjve dhe siguria online. Gjithashtu u prezantua drafti i aplikacionit inovativ për raportimin e incidenteve në shkolla, duke marrë sugjerime dhe ide për përmirësimin e tij. Një vëmendje e veçantë iu kushtua përfshirjes së të rinjve, organizatave të shoqërisë civile dhe komunitetit me rekomandime konkrete për rritjen e sigurisë në nivel lokal. Ky takim tregoi se vetëm përmes bashkëpunimit të ngushtë mes institucioneve, shoqërisë civile dhe qytetarëve mund të ndërtojmë një komunitet më të sigurt, më gjithëpërfshirës dhe më të fortë.  

Më datë 02 Tetor 2025, me qëllim forcimin e bashkëpunimit dhe ngritjen e cilësisë së punës së NSPK-ve në edukimin dhe angazhimin e të rinjve,  Programi SCPA, në bashkëpunim me Drejtorinë Vendore të Policisë Tiranë, organizoi një takim konsultues me punonjësit e të gjitha komisariateve, si dhe me shefat e seksioneve përkatëse. Gjatë takimit u diskutuan mënyrat më efektive për përmirësimin e cilësisë së temave të ndërgjegjësimit, si dhe sfidat që lidhen me bashkëpunimin ndërinstitucional mes Policisë, Drejtorive Arsimore dhe shoqërisë civile. U theksua gjithashtu mbështetja e vazhdueshme logjistike që Programi SCPA ofron për këto iniciativa. Në vijim, u trajtuan çështje të rëndësishme si: përmirësimi dhe përshtatja e prezantimeve me kohën dhe kontekstin aktual; zgjerimi i temave të ndërgjegjësimit në nivele më të larta arsimore, si klasat e nënta dhe gjimnazet; rritja e bashkëpunimit me oficerët e sigurisë në shkolla; përfshirja e tyre në trajtimin e temave të edukimit qytetar. Nw takim u ra dakord për ngritjen e grupeve të përbashkëta për përmirësimin e kurrikulave ekzistuese, si dhe për angazhimin e ekspertëve të fushës në trajtimin e temave specifike, si siguria kibernetike dhe ajo rrugore, ndërgjegjësimi ndaj përdorimit të drogave, si dhe siguria personale. Takimi u mbyll me konkluzionin për të vijuar komunikimin dhe koordinimin e mëtejshëm mbi problematikat e mundshme dhe hapat konkretë për përmirësimin e punës me të rinjtë.  

Më 30 shtator 2025 , u organizua workshopi mbi vlerësimin e punës së Mekanizmit të Koordinuar të Referimit të rasteve të dhunes në familje (MKR) në Bashkinë Fier. Aktiviteti u organizua nga Qendra Kombëtare për Shërbime Komunitare (NCCS) dhe mblodhi përfaqësues nga institucionet anetare të Ekipit Teknik Ndërdisiplinar të MKR, administratorët vendor të njësive administrative, Koordinatoren Vendore kundër dhunës në familje pranë bashkisë Fier, specialisten e barazisë gjinore dhe përfaqësues nga Bashkia Fier, punonjës policie te Drejtorisë Vendore dhe Komisariatit te Policisë Fier, përfaqesues te zyrës së Komisionerit për Mbrojtjen nga Diskriminimi, psikologë të shkollave, përfaqësues të Qendrës Sociale Murialdo, përfaqësues të Drejtorisë së Shërbimit Social, përfaqësues të Drejtorisë Rajonale të Shërbimit Social të Qarkut Fier dhe anëtarë të tjerë të MKR. Në këtë workshop, u prezantua draft raporti dhe u diskutuan me pjesëmarrësit gjetjet dhe rekomandimet në lidhje me aktivitetin e Mekanizmit të Koordinuar të Referimit të rasteve të dhunës në familje (MKR) në Bashkinë Fier.  Raporti do ti shërbejë përmirësimit të punës së MKR për menaxhimin efektiv të rasteve të dhunës me bazë gjinore, përfshirë dhunën në familje si dhe forcimit të bashkëpunimit ndërinstitucional mes institucioneve përgjegjëse. Ky aktivitet u organizua ne kuadër të projektit “Rritja e efikasitetit dhe cilësisë së shërbimit nga Policia e Shtetit, aktorët lokale dhe komuniteti për viktimat nga DHF dhe DHBGJ”, zbatuar nga Qendra Kombëtare për Shërbime Komunitare (NCCS) dhe mundësuar nga Skema e Granteve të Programit SCPA.  

Së bashku me stafin dhe drejtuesit e shkollës dhe punonjësit e Komisariatit të Policisë Kavajë, Qendra për Zhvillim dhe Iniciativa Sociale zhvilloi më 30 shtator 2025 një diskutim të hapur mbi sigurinë publike dhe mënyrat për përmirësimin e mekanizmave të komunikimit dhe reagimit në rastet që lidhen me sigurinë në shkolla. Në takim morën pjesë nxënës të klasave të 10-ta të cilët sollën ide, pyetje dhe sugjerime për rritjen e sigurisë në ambientet shkollore dhe në komunitet. Ata ndanë eksperiencat e tyre personale dhe morën pjesë në prezantime role-play, duke simuluar situata që mund të ndodhin në jetën e përditshme, për të reflektuar mbi mënyrat e reagimit dhe bashkëpunimit me institucionet. Gjatë takimit u bënë prezantime informuese mbi sigurinë në shkolla dhe policimin në komunitet, duke nxitur ndërgjegjësimin e të rinjve për rolin e tyre në parandalimin e ngjarjeve të ndryshme. Nxënësit shprehën interes për t’u përfshirë më aktivisht në nisma të edukimit qytetar dhe në forcimin e kulturës së bashkëpunimit me institucionet e rendit. Gjithashtu u prezantuan praktika bashkëpunimi ndërmjet shkollave dhe strukturave të rendit për ndërtimin e një mjedisi më të sigurt. Ky aktivitet u zhvillua në kuadër të projektit “Fuqizimi i Mekanizmave Vendore për Përmirësimin e Bashkëpunimit dhe Sigurisë Publike në Qarkun Durrës” që synon të kontribuojë në rritjen e sigurisë publike përmes forcimit të bashkëpunimit ndërmjet Policisë së Shtetit, institucioneve vendore dhe komunitetit. Ky aktivitet u zhvillua në kuadër të projektit “Fuqizimi i Mekanizmave Vendore për Përmirësimin e Bashkëpunimit dhe Sigurisë Publike në Qarkun Durrës” që po zbatohet nga Qendra për Zhvillimin dhe Iniciativa Sociale.  

Më 29 Shtator 2025, në Njësinë Administrative Bushat, u zhvillua takimi i Ekipit Teknik Ndërdisiplinor të Mekanizmit të Koordinuar të Referimit, organizuar nga “Gruaja tek Gruaja” në kuadër të Skemës së Granteve të programit SCPA. Takimi kishte për qëllim bashkëndarjen e pikave të forta, adresimin e sfidave që lidhen me trajtimin e rasteve të dhunës dhe propozime për përmirësimin e ofrimit të shërbimeve e bashkëpunimit ndërinstitucional. Në këtë aktivitet morën pjesë përfaqësues të institucioneve anëtare të MKR-së si Drejtoria Rajonale e Punësimit në Shkodër, Zyra e Përmbarimit Shkodër, Zyra e Punës Vau Dejës, Zyra për Strehimin dhe Banesat Sociale Vau Dejës, Institucioni i Prefektit Shkodër dhe Këshilli i Qarkut Shkodër, organizatat joqeveritare, drejtori i Shërbimeve Sociale Vau Dejës dhe koordinatorja vendore kundër dhunës në familje pranë bashkisë Vau Dejës. Gjatë diskutimeve u evidentuan si vështirësi vajzat dhe gratë që refuzojnë vendet e punësimit, grupet vulnerabël, mungesa e linjës së transportit që krijon kufizime të mëdha për komunitetin, veçanërisht për punësimin e grave dhe shkollimin e fëmijëve, etj. Në përfundim, pjesëmarrësit theksuan nevojën për buxhetimin në kohë të zërave të shërbimeve per mbështetjen e viktimave dhe nevojën për informim dhe ndërgjegjësim të komunitetit.  

Më 25 Shtator 2025, Qendra Shqiptare për Zhvillimin e Familjes organizoi sesionin ndërgjegjësues me nxënësit e Shkollës së Mesme Jo-publike ‘Rilindja’ në Durrës, si pjesë e projektit “Ndërgjegjësimi dhe Aktivizimi i të Rinjve për Siguri dhe Edukim”. Pas një prezantimi të shkurtër në klasë, të rinjtë patën mundësinë të provojnë makinën e simulimit të aksidentit. Për disa prej tyre ishte tronditëse, për të tjerë një eksperiencë tepër e veçantë: “Të kuptosh nga afër rrezikun është krejt ndryshe nga ta dëgjosh me fjalë”. Me mbështetjen e ekspertëve të sigurisë dhe përfaqësuesve të Drejtorisë Vendore të Policisë Durrës, si dhe stafin e shkollës, të rinjtë reflektuan mbi sjelljet e tyre dhe rolin që secili ka për të parandaluar rreziqet. Aktiviteti synoi t’i japë zë të rinjve në promovimin e një kulture qarkullimi më të ndërgjegjshme dhe më të përgjegjshme.