Ekipi i Menaxhimit të Programit SCPA (PMT), në bashkëpunim me përfaqësues të Policisë së Shtetit, organizoi sesionin e dytë të serisë së seminareve me titull “Përmirësimi i Sistemit të Statistikave të Prodhuara dhe të Përdorura nga Strukturat e Rendit Publik”. Anëtarët e Grupit të Punës vazhduan të punojnë ngushtë me qëllim krijimin e një sistemi funksional të statistikave të rendit dhe sigurisë publike. Gjatë kësaj seance, pjesëmarrësit u përqendruan në të dhënat e dobishme për policinë duke shqyrtuar formularët përkatës të statistikave dhe duke ndarë përvoja dhe informacione mbi përmirësimin e përmbajtjes së formularëve të statistikave të rendit publik. Grupi i Punës do të vazhdojë bashkëpunimin me qëllim rritjen e saktësisë, besueshmërisë, krahasueshmërisë dhe përdorimit efektiv të statistikave të rendit dhe sigurisë publike.  

Më 28 janar 2026, në Bashkinë Malësi e Madhe, Shkodër u zhvillua takimi i Këshillit Vendor të Sigurisë Publike (KVSP), i cili shënoi takimin e parë për vitin 2026. Ky takim u zhvillua në kuadër të zbatimit të Skemës së Granteve dhe në bashkëpunim me organizatwn “Gruaja tek Gruaja” dhe me pjesëmarrjen e përfaqësuesve nga institucionet në nivel vendor të bashkisë, policisë dhe arsimit. Takimi u fokusua në prezantimin dhe diskutimin e rezultateve të Sistemit të Matjes së Sigurisë në Komunitet (SMSK), bazuar në të dhënat e mbledhura nga anketimi i qytetarëve në dy nënzonat e bashkisë. Përfaqësuesit e Programit SCPA theksuan rëndësinë e bashkëpunimit ndërinstitucional në nivel vendor, si një element kyç për adresimin efektiv të çështjeve të sigurisë publike. U nënvizua gjithashtu se studimi nuk duhet parë vetëm si një raport statistikor, por si një mjet praktik të dhënash, përmes të cilit institucionet vendore mund të reflektojnë mbi çështjet që qytetarët i perceptojnë si pozitive, si dhe mbi fushat ku kërkohet më shumë vëmendje dhe mbështetje institucionale. Diskutimet ndërmjet anëtarëve të KVSP-së u përqendruan në perceptimet e komunitetit mbi sigurinë, dhe shqetësimet e evidentuara të cilat do të shqytoheshin më tej nëpërmjet punës në koordinim mes strukturave vendore. Takimi kontribuoi në forcimin e dialogut ndërinstitucional dhe hodhi bazat për identifikimin e prioriteteve dhe ndërhyrjeve konkrete në funksion të rritjes së sigurisë dhe besimit të komunitetit.  

Profesionistë të institucioneve vendore pjesë të Rrjetit Rajonal me 7 ETN-të (Ekip Teknik Ndërdisiplinor) e Bashkive të Qarkut Elbasan ishin pjesëmarrës aktiv në takimin që Forumi Gruas Elbasan realizoi me datën 29 Janar 2026. Gjatë takimit u prezantua rastet dhe sfidat e menaxhimit të tyre nga Gjykata, Prokuroria, Drejtoria Vendore e Policisë Elbasan dhe 7 Koordinatoret vendore të dhunës në 7 Bashkitë e Qarkut Elbasan. Ky takim ka qënë gjithashtu një mundësi e mirë për ndarjen e praktikave pozitive të zhvilluara gjatë punës me rastet e Dhunës në Familje dhe Dhunës me Bazë Gjinore midis 7 ETN-ve të Bashkive të Qarkut Elbasan. Ky aktivitet u zhvillua në kuadër të projektit “Partneriteti mes Policisë së Shtetit, aktorëve lokal dhe komunitetit në lidhje me Dhunën në Familje dhe Dhunën me Bazë Gjinore në Qarkun Elbasan”, pjese e Skemës së Granteve të Programit.  

Në datën 20 Janar 2026, në kuadër të Skemës së Granteve u organizua një takim me nxënësit në shkollën “Fiqiri Kurti” Kavajë. Së bashku me stafin dhe drejtuesit e shkollës dhe punonjësit e Komisariatit të Policisë Kavaje, takimi u realizua në formatin e prezantimit dhe diskutimit të hapur mbi paketën e sigurisë dhe mënyrat për përmirësimin e mekanizmit të komunikimit dhe reagimit në rastet që lidhen me sigurinë në shkolla. Në takim morën pjesë rreth 50 nxënës, të cilët kontribuan me pyetje dhe ide mbi mënyrën se si mund të përmirësohet siguria në ambientet shkollore dhe në komunitet. Gjatë diskutimit u fol mbi çështjen e sigurisë në shkolla dhe policimin në komunitet, duke nxitur reflektim dhe ndërgjegjësim te nxënësit për rolin e tyre në parandalimin e incidenteve. Gjithashtu u prezantuan praktika bashkëpunimi ndërmjet shkollave dhe strukturave të rendit për ndërtimin e një mjedisi më të sigurt dhe bashkëpunues. Ky aktivitet u zhvillua në kuadër të projektit “Fuqizimi i Mekanizmave Vendore për Përmirësimin e Bashkëpunimit dhe Sigurisë Publike në Qarkun Durrës” , i cili po zbatohet nga Qendra për Zhvillim dhe Iniciativa Sociale.  

Më 22 janar 2026, Këshilli Vendor për Sigurinë Publike (KVSP) Elbasan në bashkëpunim me organizatën Tjetër Vizion, zhvilloi një takim bashkëbisedues me të rinjtë e Këshillit Vendor Rinor të Bashkisë Elbasan, duke krijuar një hapësirë dialogu mbi sfidat dhe nevojat konkrete të sigurisë publike në komunitet. Takimi theksoi rolin e të rinjve si aktorë kyç në parandalimin dhe raportimin e incidenteve, veçanërisht në mjediset shkollore. Në këtë kuadër, u prezantua kontributi i projektit PARTNER përmes zhvillimit të një aplikacioni online për denoncimin e incidenteve në shkolla, i cili mundëson raportim të sigurt, të shpejtë dhe ndjekje institucionale të rasteve të referuara. Gjatë aktivitetit, Kryetari i Bashkisë Elbasan, njëkohësisht Kryetar i KVSP, prezantoi situatën e sigurisë publike në bashki, duke iu referuar gjetjeve të studimit të perceptimit qytetar për çështjet e sigurisë publike, realizuar në kuadër të projektit PARTNER në qarkun Elbasan. Ky proces ka shërbyer si bazë për ndërhyrje më të informuara dhe politika vendore të orientuara nga nevojat reale të komunitetit. Ky angazhim dëshmon se përfshirja e të rinjve, e kombinuar me mjete digjitale dhe vendimmarrje të bazuar në të dhëna, përbën një hap konkret drejt ndërtimit të komuniteteve më të sigurta dhe më gjithëpërfshirëse.  

Më 23 janar 2026, Ekipi i Menaxhimit të Programit SCPA, në bashkëpunim me përfaqësues nga Policia e Shtetit, organizoi një seminar të fokusuar në diskutimin e draft manualit “Metodat dhe Praktikat Efektive për Zhvillimin e Temave për Rritjen e Ndërgjegjësimit me Nxënësit”. Seminari mblodhi së bashku Shefin e Sektorit të Policimit në Komunitet të Drejtorisë së Rendit Publik  dhe 10 Specialistë për Edukimin dhe Punën me të Rinjtë. Pjesëmarrësit punuan së bashku për të shqyrtuar draft manualin dhe për të rënë dakord për versionin e tij përfundimtar të përditësuar. Përveç kësaj, Koordinatori i Programit dhe Specialistët për Edukimin dhe Punën me të Rinjtë shqyrtuan dhe përditësuan së bashku modulet e trajnimit në PowerPoint që synojnë rritjen e ndërgjegjësimit me nxënësit mbi parandalimin e përdorimit të drogës, konsumimit të alkoolit dhe pirjes së duhanit, sigurinë rrugore, bullizmin dhe krimin kibernetik. Seminari përfundoi me një dakortësi mbi mjetet dhe qasjet e përmirësuara dhe një angazhim të përbashkët për parandalim dhe ndërgjegjësim efektiv, të fokusuar te nxënësit.  

Më 16 dhjetor 2025, në Shkollën e Mesme Profesionale “Petro Sota” në Fier, u zhvillua forumi mbi parandalimin e krimit tek të rinjtë, i organizuar nga Qendra “Epoka e Re”, në kuadër të projektit “Skuadra e Sigurisë Publike 2 – Partner për një komunitet të sigurt”, pjesë e Skemës së Granteve të Programit SCPA. Qëllimi i këtij forumi ishte të kuptohej më mirë se cilat janë sfidat me të cilat përballen të rinjtë në komunitet, cilat janë sjelljet që i ekspozojnë ata ndaj riskut, si dhe rëndësia e ndërhyrjes në kohë përmes informimit, mbështetjes dhe bashkëpunimit ndërinstitucional. Në aktivitet morën pjesë përfaqësues të Drejtorisë Vendore të Policisë Fier, oficer për policimin në komunitet i zonës, drejtoresha e shkollës “Petro Sota”, psikologia e shkollës, juristja e Shërbimit të Provës Fier, si dhe stafi pedagogjik i shkollës. Gjatë forumit u trajtuan fenomenet kryesore të kriminalitetit që prekin të rinjtë, mënyrat e bashkëpunimit me institucionet arsimore, si dhe rëndësia e rolit aktiv të të rinjve në raportimin dhe parandalimin e sjelljeve të paligjshme. U diskutua gjithashtu mbi punën me të miturit, sjelljet që çojnë drejt konfliktit me ligjin dhe masat parandaluese që synojnë rehabilitimin dhe riintegrimin e të rinjve në komunitet. Një vëmendje e veçantë iu kushtua faktorëve socialë që ndikojnë në sjelljet me risk, si dhe nevojës për mbështetje të vazhdueshme për familjet dhe të rinjtë, përmes bashkëpunimit të ngushtë me shkollat dhe institucionet e tjera. Në pjesën përmbyllëse të aktivitetit u zhvillua një diskutim i hapur dhe ndërveprues me nxënësit, të cilët ndanë perceptimet e tyre mbi rreziqet në komunitet, nivelin e informacionit që kanë mbi ligjet dhe pasojat e sjelljeve të rrezikshme, si dhe sugjerime për përmirësimin e klimës së sigurisë në shkollë. Çështjet e trajtuara theksuan rëndësinë e parandalimit të hershëm, edukimit ligjor dhe mbështetjes psiko-sociale si elementë kyç për reduktimin e kriminalitetit dhe promovimin e paqes sociale mes të rinjve.  

Më datë 10 dhjetor 2025, në kuadër të 16 ditëve të aktivizmit kundër dhunës ndaj grave, Qendra Kombëtare për Shërbime Komunitare zhvilloi një aktivitet ndërgjegjësues me nxënësit e shkollës 9-vjeçare “Halit Grëmi” Fier. Fëmijët morën pjesë në diskutime interaktive mbi format e dhunës dhe rëndësinë e parandalimit dhe raportimit të saj. Gjatë aktivitetit u shpërndanë fletëpalosje me informacion për format e dhunës dhe mesazhe frymëzuese, si: “Mos lejo askënd të të dhunojë”, “Raporto dhunën”, “Kërko ndihmë ti nuk je vetëm”. Qëllimi i këtij aktiviteti është t’i fuqizojmë fëmijët me njohuri dhe informacion, si dhe t’i mbështesim për të ndërtuar një mjedis të sigurt, miqësor dhe përfshirës në çdo ambient si në familje, në shkollë dhe në komunitet duke promovuar respekt dhe tolerancë. Ky aktivitet synoi të rrisë ndërgjegjësimin për parandalimin e dhunës në familje dhe dhunës me bazë gjinore, duke forcuar bashkëpunimin ndërmjet Policisë së Shtetit, aktorëve lokalë dhe komunitetit. Nxënësit morën pjesë aktivisht, shpërndanë fletëpalosje informuese dhe diskutuan mënyrat për të krijuar një mjedis të sigurt, të barabartë dhe respektues.  

Më 10-12 dhjetor 2025, grupi i katërt i Oficerëve të Patrullës së Përgjithshme dhe personeli i Sallës së Komandës dhe Kontrollit të DVP Vlorë morën pjesë në trajnimin e zhvilluar nga Ekipi i Menaxhimit të Programit SCPA në ambientet e DVP Vlorë. Gjatë këtij trajnimi pjesëmarrësit u njohën si me pjesën teorike ashtu edhe me ushtrimet praktike dhe me punën në grup, duke u fokusuar në filozofinë e Policimit në Komunitet dhe zbatimin e elementeve të saj në punën e përditshme të oficerëve të Policisë së Shtetit. Gjithashtu, atyre iu prezantuan situata/ushtrime praktike për t’u trajtuar dhe zgjidhur prej tyre teksa punuan në grup me synimin për të siguruar masat që duhen marrë në mënyrë proaktive për zbatimin e elementeve të Policimit në Komunitet. Vëmendje e veçantë iu kushtua trajtimit të rasteve të Dhunës në Familje si në aspektin teorik ashtu edhe atë praktik. Me qëllim për të ofruar module trajnimi gjithëpërfshirëse, ekipi i Programit SCPA bashkëpunoi me Qendrën e Koordinimit Kundër Ekstremizmit të Dhunshëm, ekspertët e së cilës ofruan  leksione ndërvepruese mbi luftën kundër ekstremizmit të dhunshëm. Praktikat më të mira të BE-së për zbatimin e filozofisë së PK-së u ndanë e shkëmbyen me oficerët e PSH. Në përfundim të këtij trajnimi, oficerët e PSH arrijnë të përmirësojnë njohuritë dhe kapacitetet e tyre për zbatimin e Policimit në Komunitet.  

Më 9 Dhjetor 2025, në shkollën e mesme “Dodë Kaçaj” në Bajzë, Malësi e Madhe, u zhvillua takimi ndërgjegjësues me nxënësit e klasës së 10-të, organizuar nga “Gruaja tek Gruaja” në kuadër të Skemës së Granteve të Programit SCPA dhe Fushatës së 16 Ditëve të Aktivizmit kundër Dhunës me Bazë Gjinore. Aktiviteti synonte forcimin e njohurive të nxënësve mbi policimin në komunitet dhe rolin aktiv të të rinjve në rritjen e sigurisë. Në fillim, nxënësit u njohën me parimet e këtij modeli të bashkëpunimit midis policisë dhe qytetarëve, ndërsa më pas u organizuan në katër grupe pune që analizuan situata reale që lidhen me konfliktet mes të rinjve, sjelljen në rrjetet sociale, sigurinë pranë shkollës dhe perceptimin ndaj policisë në komunitet. Gjatë bashkëbisedimit, nxënësit vunë në dukje se ndërgjegjësimi për sjelljet e përditshme dhe reagimi i shpejtë ndaj situatave të pasigurta mund të bëjë ndryshim real në komunitet. U shpreh edhe nevoja për më shumë qartësi dhe mbështetje kur të rinjtë përballen me vështirësi, si dhe rëndësia që ka mënyra e komunikimit në rrjetet sociale. Gjatë diskutimeve, ata identifikuan edhe aktorët kryesorë në menaxhimin e rasteve problematike dhe propozuan mënyra konkrete bashkëpunimi mes shkollës, familjes, policisë dhe bashkisë.