Më 30 korrik 2025, Programi SCPA organizoi takimin e dytë të Këshillit Drejtues (KD) me pjesëmarrjen e palëve të ndryshme të interesuara. Mledhja e KD u bashkëkryesua nga Z. Rebani Jaupi, Drejtor i Departamentit për Rendin dhe Sigurisë Publike në PSH dhe Znj. Linda Gjermani, Menaxhere e Programit në Ambasadën e Suedisë. Në takim morën pjesë palë të interesuara si drejtuesit e PSH në fushën e sigurisë publike dhe trajnimit të policisë, përfaqësues nga Ministria e Arsimit dhe Sportit, Ministria e Shëndetësisë dhe Mbrojtjes Sociale, Agjencia e Mbështetjes së Shoqërisë Civile dhe Shoqata për Autonomi Vendore. Drejtori i PSH, Z. Rebani Jaupi, përmendi se PSH, si përfituesi kryesor i Programit SCPA, mbetet e përkushtuar për të zbatuar filozofinë e policimit në komunitet dhe për të siguruar bashkëpunimin me komunitetin për të rritur sigurinë. PSH është angazhuar në mënyrë aktive në aktivitetet e programit dhe ka diskutuar zbatimin e tyre hap pas hapi. PSH është e kënaqur të shohë që aktorë të tjerë nga institucionet shtetërore, qeverisja vendore dhe shoqëria civile janë përfshirë gjithashtu në zbatimin e aktiviteteve, pasi qëllimi i policimit në komunitet është që këta aktorë të bashkëpunojnë, në mënyrë që të kontribuojnë së bashku në rritjen e sigurisë në komunitetet tona. Znj. Linda Gjermani, përmendi se Qeveria e Suedisë mbetet e përkushtuar për të mbështetur PSH në zhvillimin e fushave të sigurisë publike dhe policimit në komunitet. Ajo shtoi se Raporti i Progresit është një pasqyrim i rezultateve të arritura nga programi SCPA në të gjithë komponentët e tij gjatë fazës së tretë. Programi SCPA ka adresuar nevojat e përfituesve dhe ka përditësuar qasjet përkatëse. Zbatimi i Programit SCPA funksionon mirë si rezultat i bashkëpunimit të shkëlqyer të përfituesit të tij kryesor, Policisë së Shtetit. Andi Shundi, Drejtuesi i Ekipit të Menaxhimit të Programit SCPA, shpjegoi progresin e bërë deri më tani në kuadër të zbatimit të aktiviteteve të planit të punës gjatë semestrit të dytë dhe gjithashtu u përqendrua në aktivitetet e parashikuara që do të zbatohen në semestrin e ardhshëm. Palët e interesuara të programit patën diskutime në lidhje me zbatimin e aktiviteteve të programit në funksion të bashkëpunimit dhe koordinimit ndërinstitucional. Takimi përfundoi me miratimin unanim të Raportit të Parë të Progresit të SCPA-së. Të gjithë palët e interesuara shprehën vlerësimin e tyre për bashkëpunimin e frytshëm dhe të suksesshëm me Programin dhe shprehën gatishmërinë e tyre për bashkëpunim dhe angazhim të mëtejshëm.  

Në kuadër të aktiviteteve të planit të punës së Programit SCPA, EMP organizoi një trajnim dy-ditor, më 29-30 korrik 2025, drejtuar Ndihmës Specialistëve të Policimit në Komunitet (NSPK) për Edukimin dhe Punën me të Rinjtë të sapoemëruar në DVP Tiranë. Trajnimi u përqendrua në objektivat dhe aktivitetet sipas roleve të tyre dhe shkëmbimin e përvojave dhe njohurive të fituara gjatë ushtrimit të detyrës. Theksi iu vu gjithashtu forumit online në Facebook si një mjet komunikimi për të rritur ndërgjegjësimin mbi edukimin e të rinjve. Dita e parë e trajnimit u përqendrua në analizën e punës së kryer nga NSPK për Edukimin dhe Punën me të Rinjtë në lidhje me policimin në komunitet dhe kontaktet e tyre me të rinjtë në shkolla, ndërsa organizojnë fushata të ndryshme ndërgjegjësimi me fokus sigurinë e të rinjve. Dita e dytë e trajnimit u përqendrua në masat proaktive që duhen ndërmarrë përmes fushatave ndërgjegjësuese dhe policimit në komunitet për të parandaluar dhe luftuar përdorimin e drogave pararendëse nga të rinjtë dhe për të inkurajuar respektimin e rregullave të qarkullimit rrugor dhe rritjen e sigurisë rrugore. Përveç kësaj, trajnimi përfshinte një modul komunikimi për të pajisur NSPK për Edukimin dhe Punën me të Rinjtë me aftësi themelore komunikimi dhe prezantimi me qëllimin për të siguruar qëndrueshmëri dhe cilësi në aktivitetet ndërgjegjësuese të organizuara në shkolla. Trajnimi u organizua përmes ushtrimeve praktike dhe ushtrimeve me role, të cilat synonin të forconin aftësinë e NSPK për Edukimin dhe Punën me të Rinjtë për të krijuar dhe organizuar fushata ndërgjegjësimi me ndikim, të përshtatura për audiencën rinore, si dhe për të pasur një qasje miqësore ndaj të rinjve për të siguruar sigurinë e tyre.  

Më datë 23 dhe 24 korrik 2025, QSNNN organizoi takim e tretë dhe të katërt me përfaqësues të komunitetit gra dhe vajza në Iballe dhe Fierzë, në kuadër të Projektit Projekti “BESO: së Bashku vEprojmë për Sigurinë e komunitetit tonë!”. Qëllimi kryesor i këtyre aktiviteteve ishte rritja e ndërgjegjësimit dhe forcimi i besimit të grave dhe vajzave të komunitetit ndaj Policisë së Shtetit. Përmes inkurajimit të dialogut dhe bashkëpunimit të ndërsjellë, aktiviteti synonte të forconte marrëdhëniet mes komunitetit dhe forcave të rendit, duke nxitur ndjenjën e sigurisë dhe mbështetjes reciproke. Kjo qasje kontribuon në krijimin e një mjedisi më të sigurt, gjithëpërfshirës dhe mbështetës për qytetarët.  

Me datë 23 korrik 2025, së bashku me koordinatorët e EKO Mendje dhe edukatoret e kopshtit “1 Qershori”, organizuam një aktivitet edukues dhe argëtues me fëmijët e këtij institucioni: një “lojë thesari” me tematikë sensibilizuese për sigurinë rrugore. Fëmijët, të veshur si policë rrugorë apo si sinjalistikë rrugore, morën pjesë aktivisht në këtë lojë, ku synimi final ishte të arrinin “në shtëpi” duke ndjekur sinjalistikën e duhur. Ky aktivitet ishte një mënyrë e bukur dhe gjithëpërfshirëse për të edukuar më të vegjlit mbi rëndësinë e rregullave të qarkullimit. Postimi në rrjete sociale pati një reagim shumë pozitiv, duke u bërë viral dhe duke sjellë përgëzime nga qytetarë të shumtë si dhe nga vetë Drejtoria e Policisë Shkodër.

Ekipi i Menaxhimit të Programit SCPA organizoi sesionin e parë të seminarit mbi ‘Kuadrin e Statistikave të Rendit Publik dhe të Policimit në Komunitet’ më 25 korrik 2025 me përfaqësues nga strukturat e policisë së rendit dhe sigurisë publike të PSH. Seminari është organizuar në zbatim të aktivitetit përkatës të planit të punës për të përpunuar dhe shqyrtuar kuadrin e statistikave të rendit publik dhe të Policimit në Komunitet. Pas takimeve të mbajtura në nivel Komisariati Policie, dhe DVP në disa qarqe tw ndryshme, EMP pati mundësinë të diskutonte mbi kuadrin e statistikave të rendit publik dhe gjithashtu të mblidhte informacione dhe dokumente që lidhen me këtë fushë për shqyrtim të mëtejshëm. Janë mbajtur gjithashtu takime me strukturat përkatëse të rendit publik në DPPSH dhe është arritur një marrëveshje për të organizuar dy sesione seminaresh mbi ‘Kuadrin e Statistikave të Rendit Publik dhe të Policimit në Komunitet’ në bashkëpunim dhe koordinim me strukturat përkatëse të Policisë së Shtetit. Gjatë sesionit të parë të seminarit, EMP u përqendrua në vlerësimin dhe konstatimet e tij mbi kuadrin e statistikave. Përfaqësuesit e PSH ndanë komentet dhe mendimet e tyre mbi vlerësimin dhe konstatimet e EMP dhe ranë dakord të vazhdojnë me sesionin e dytë të seminarit që do të mbahet në fillim të shtatorit 2025. Qëllimi i organizimit të seminareve është përmirësimi i kuadrit të statistikave të rendit publik në mënyrë që të mbështesë më shumë vendimmarrjen në nivel strategjik brenda organizatës policore.  

Shoqata “Gender, Paqe e Siguri”, zhvilloi më 23 korrik 2025 takimin e dytë me grupin e punës për zonën e Durrësit me pjesëmarrjen e përfaqësuesve nga rajonet 1–4 dhe njësia administrative Rrashbull. Pjesë e takimit u bënë administratorë socialë, punonjës të mbrojtjes së fëmijëve, punonjës socialë pjesë e Njësisë së Vlerësimit të Nevojave dhe Referimit të Rasteve, punonjës të shërbimit psikosocial pranë qendrave shëndetësore, si dhe përfaqësues nga Prefektura. Fokus i takimit u bë diskutimi i rasteve konkrete me qëllim adresimin e nevojave, rritja e aksesit në shërbime për kategoritë vulnerabël, nevoja për qendra komunitare në çdo zone, roli dhe ngarkesa e Specialistëve të Policimit në Zonë në trajtimin e rasteve të dhunës. U theksua gjithashtu rëndësia e bashkëpunimit ndërinstitucional dhe roli i Prefekturës si hallkë kyçe mes institucioneve vendore dhe qëndrore për adresimin e nevojave të komunitetit.  

Në kuadër të projektit “Forcimi i Bashkëpunimit dhe Ndërhyrjeve për Parandalimin dhe Adresimin e Dhunës në Familje”, Shoqata “Gender, Paqe e Siguri” organizoi një takim ndërgjegjësues me komunitetin e zonës së Rrashbullit, Durrës. Takimi u zhvillua pranë Qendrës Komunitare Multifunksionale Rrashbull, ku morën pjesë përfaqësues të Njësisë së Vlerësimit të Rasteve dhe Referimit të Nevojave (NjVNR), përfaqësues nga Njësia për Mbrojtjen e Fëmijëve, punonjëse të qendrës shendetësore, anëtarë të komunitetit. Diskutimet u fokusuan në rolet konkrete të secilit institucion në mbështetje të viktimave të dhunës, ku pjesëmarrësit patën mundësi të adresojnë pyetje dhe të marrin informacion të detajuar mbi shërbimet që ofrohen. Edhe pse Specialisti i Policimit në Komunitet nuk ishte i pranishëm, roli i policisë në trajtimin e rasteve të dhunës u diskutua dhe u theksua rëndësia e bashkëpunimit ndërinstitucional. Ky aktivitet synon të forcojë ndërveprimin mes institucioneve dhe komunitetit për të ndërtuar një mjedis më të sigurt dhe mbështetës për të gjithë.  

Më datë 8 korrik 2025, “Gruaja tek Gruaja” zhvilloi një workshop me anëtarët e ekipit teknik të Mekanizmit të Referimit në Malësinë e Madhe, Shkodër. Gjatë takimit, përmes një ushtrimeve interaktive, u diskutuan sfidat dhe arritjet e gjashtëmujorit të parë të vitit 2025. Pjesëmarrësit trajtuan raste konkrete, duke theksuar bashkëpunimin efektiv me Komisariatin e Policisë Malësi e Madhe, si dhe vështirësitë që lidhen me ndërrimin e shpeshtë të stafit dhe kërcënimet ndaj punonjësve nga palët e paditura në çështje gjyqësore mbi dhunën në familje. U vlerësua roli i rëndësishëm i strehëzës së emergjencës “Gruaja tek Gruaja” në Shkodër si një pikë e fortë e mbështetjes për viktimat e dhunës. Punonjësit shprehën se ka një rritje të dukshme të ndërgjegjësimit në komunitet dhe se gratë po raportojnë dhunën më shumë se më parë. Në fund të takimit, edhe si një rekomandim për punën në të ardhmen, u theksua se përmbushja e detyrave nga çdo aktor kontribuon në zgjidhjen e rasteve dhe në ofrimin e mbështetjes konkrete për viktimat e dhunës.  

Më datë 09 korrik 2025, QSNNN organizoi një trajnim për stafin e bashkisë e Fushë-Arrëz në kuadër të Projektit “BESO: së Bashku Veprojmë për Sigurinë e komunitetit tonë!”. Ky aktivitet u zhvillua me pjesëmarrjen e stafit te Drejtorisë së Shërbimit Social të Bashkisë Fushe-Arrëz, Drejtorisë së Financës, Qendrës Komunitare Multifunksonale dhe Njësive Administrative. Qëllimi i këtij aktiviteti ishte trainimi i stafit të bashkisë në mënyrë që të jenë të përgatitur për të identifikuar, raportuar dhe trajtuar rastet potenciale të dhunës në familje, duke përmirësuar kështu përgjigjen lokale ndaj çështjeve të sigurisë dhe mirëqenies së komunitetit.  

Më datë 8 korrik 2025, QSNNN organizoi takimin e dytë me përfaqësues të komunitetit (gra dhe vajza) në Fushë-Arrëz në kuadër të Projektit Projekti “BESO: së Bashku Veprojmë për Sigurinë e komunitetit tonë!”. Qëllimi i këtij aktiviteti ishte njohja e grave dhe vajzave me shërbimet policore dhe institucioneve të tjera vendore në lidhje me viktimat e dhunës me bazë gjinore si dhe masat parandaluese ndaj dhunës në familje. Aktiviteti synoi forcimin e marrëdhënieve mes komunitetit dhe policisë së shtetit duke inkurajuar dialogun, bashkëpunimin për sigurinë dhe ndjenjën e mbështetjes së ndërsjelltë.